Tooimâ návt
- Keevti määlistmist pyerebeht mätkivyeššee ko ávustuulâ.
- Jis tun cokkiittâh ávustuulâ, te keevti merkkejum já tipšum tulâstâllâmsoojijd ain ko tot lii máhđulâš. Keevti tulâstâlmân uáivildum muorâid šiäštulávt.
- Meccipuáluváruttâs ääigi ávustuulâ cokkiittem lii ain kieldum eres saajeest ko mälistemkáttusijn, main láá hoormih.
- Ele kiško peesijd tâi vuolâ pasemijd ellee muorâin.
- Čurgii luodâidâd já raajâ tulâstâllâmsaje anokáálvuid. Ele puáldi aluminfolio tâi eres pakkammaterialijd, moh siskeldeh pyelimettumis amnâsijd. Tuálvu ruuskijd fárustâd meddâl.
- Jis tun cokkiittâh tuulâ eres saajeest ko čujottum tulâstâllâmsoojijn, te tun tarbâšah ain eennâmomâsteijee love. Ko tun lah finnim love, te nuávdit čuávuváid ravvuid:
- Ele cokkit tuulâ njuolgist källee oolâ – kumesvuotâ cyevkkee keđgiase.
- Keevti puáris tulâstâllâmsaje.
- Jis puáris tulâstâllâmvuáđu ij kavnuu, te kuáivu enâmist alemuu, humusnallii eennâmkeerdi ovdâmerkkân kukkákuáivoin já rulláá tom tulâstâllâmsaje paaldân.
- Čuági puáldimmuorrân já pasemin pođoi oovsijd já máhđulijd čuopâttâhpasâttâsâid enâmist.
- Ko tun lah kiergânâm tulâstâlmist, te časkâd tuulâ huolâlávt čassijn já njuoskâd ovdeláá koivum eennâmkeerdi já tiälláá tom sajasis. Čurgii tulâstâllâmsaje nuuvt pyereest, et tulâstâlmist ij pääsi maggaargin luoddâ.
Mondiet?
Ko puáldimmuorâid ij taarbâš jođettiđ nuuvt távjá, te larmâ- já luoštâhááituh já máhđulâš eennâmvuáđu kuullâm kiäppáneh. Ko tun kiävtáh mätkivyeššee já puáldimmuorâid nuuvt šiäštulávt ko máhđulâš, te tun kepidâh puáldimmuorâi joođeetmist šaddee mirhâlâš kaasui já šoŋŋâdâhnubástus ovdedeijee čiđđâdioksidiluoštui mere. Pyellee muorâst já tuolvâ evvispápárijn luovâneh mirhâliih suovâkaasuh, nuuvtko čiđđâvety, PAH-ovtâstuvvah, hágá já tyypi oksideh.
Tondiet ko meccipuálu cokkân älkkeht meccipuáluváruttâs ääigi, te tuulâ cokkiittem lii talle ain kieldum tulâstâllâmsoojijn-uv. Hormijguin riäidudum grillim- já mälistemkáttusij kulen tuulâ cokkiittem lii kuittâg ain loválâš. Luuvá lase tuulâ čokkiitmist (suomâkielân).