Njellim kiäinuh

Vandârdemkiäinuh já pálgáh

• Njellim vuojâttemrääni kuuvl jotá 2,7 km kukkosâš merkkejum päälgis. Pálgá vyelgimsaje lii Njellimist Virdáánjaargân jottee maađij piällást suullân neelji kilomeetter keččin Njellim siijdâst.
• Piilola päälgis, 35 km, ovtâstit taažâ Paje-Paččvei aalmuglâšmeeci já Vääččir meccieennâmkuávlu. Kiäinu taavaakeeji vyelgimsaje lii Sortbryststjern-nommâsii jäävri riddoost Paje-Paččvei aalmuglâšmeeci tavenuorttii keččin. Kiäinu máddáákeeji vyelgimsaje lii Kessi maađij piällást Vääččir meccieennâmkuávlu máddáákeččin. Piilola päälgis lii mučis meccieennâmkiäinu, mii luáddu pecivaljaas, kiäđgáás kuolbânijd. Jeegih, jäävrih já siemin juvviih pyehtiđ pálgás maaŋgâpiälásijd enâduvâid. Piilola päälgis lii enâduvâidis peeleest tommit vátávâš kiäinu, et tot ij soovâ pyereest eskin algâttellee vandârdeijeid.

Čuoigâmkiäinuh

Njellim kuávlust uážžu čuoigâđ rijjâ. Páihálij ässei kiälkkáluodâid puáhtá kevttiđ iššeen ovdâmerkkân talle ko lii hyenes sijvo. Njellim siijdâst lii meid kuulmâ kilomeetter kukkosâš čyevvejum saaveehlättee.

Čäci- já miällumkiäinuh

• Aanaarjävri suápá uáli pyereest kárbáin jotemân. Kärbishamâneh láá Anarist, Viäskoonjaargâst já Njellimist. Kárbályeštimnjuáiduseh Aanaarjävri láá maŋgâ. Väävlih láá merkkejum já Aanaarjäävri kárbáinjotteemkárttá iššeed jotemist. Aanaarjäävri alne jotemist kalga huámášiđ, et jävri lii arktisâš stuorrâjävri já šoŋŋâ sáttá muttuđ jotelávt. 
• Njellim vuojâttemrääni čácádâhkiäinu

Moottorkiälkkákiäinuh já -rađeh

• Njellim siijdâst vuálgá moottorkiälkkárađe Avelân já Vääččir meccieennâmkuávlu rasta Njižžjáávrán já Čevetjáávrán. Lasetiäđuid já luuvijd finnee Meccihaldâttâs Avveel palvâlemsajást já Paje-Laapi luándukuávdáš Siidast.
• Myetkivääri lii pivnohis moottorkiälkkávandârdemsaje. Myetkivääri oolâ piäsá tuše uápistum kiälkkásafarijn, tondiet ko tot lii räjistielâsist.