Njellim aktiviteteh

Maid Njellimist puáhtá porgâđ?

Väzziđ merkkejum kiäinui mield 

Njellim kuávlust lii ohtâ merkkejum kiäinu, mii jotá ovdiistum vuojâttemrääni kuuvl. Kuávlu luándun puáhtá uápásmuđ meid jieijâs pálgái mield väzzimáin. Kuávlu lohtâs taavaabeln kiddâgávt Vääččir meccikuávlun (suomâkielân) já máddáábeln Čaarmâuáivái meccikuávlun.

Piilola pálgá máddáápele vuolgâsajan piäsá Njellim peht. Vyelgimsaje lii Kessi maađij (Kessintie) piällást Vääččir meccieennâm máddáábeln. Piilola päälgis lii 35 kilomeetter kukkosâš kiäinu, mii ovtâstit taažâ Paje-Paččvei aalmuglâšmeeci já Vääččir meccikuávlu.

Miälluđ

Njellim kuávlust láá šiev máhđulâšvuođah miälumân. Aanaarjävri suápá uáli pyereest miälumân. Jäävrist iä lah merkkejum miällumkiäinuh, mut Aanaarjävri miälloo várás -sijđoin láá iävtuttum kyehti kiäinu, moi vyelgimsaijeen lii Njellim kärbishaammân. Ton lasseen miällumraavâ lii finnimnáál kiäinu várás Vuáskujäävrist Njellimjáávrán.

Jotteeđ moottorkárbáin

Kárbáiguin jottei várás lii haammân Njellim kuávdáást. Vijđes Aanaarjävri fáálá mučis enâduvâid meid moottorkárbáiguin jottei várás. Njellimist aldemus kárbáinjotteetoorjâsaje lii Speinnjargâ.

Kejâdiđ uáinámušâid já várdusijd 

Merhâšittee uáinámušah Njellimist láá vuojâttemränni, Ryevdiporttâ, Paččvei šalde já kuulmâ väldikode räjiurrâ Myetkiväärist.

Čuoigâđ tipšum saaveehlättei mield já meecist

Njellim kuávlust uážžu čuoigâđ rijjâ. Páihálij ässei kiälkkáluodâid puáhtá kevttiđ iššeen ovdâmerkkân talle ko lii hyenes sijvo. Njellim siijdâst lii meid kuulmâ kilomeetter kukkosâš čyevvejum saaveehlättee.

Kuálástiđ

• Aanaarjävri
  • Vuoggâkuálástem várás Aanaarjäävrist kalga jo-uv mäksiđ kyelivaljetipšommáávsu (ohtâ stággu) (eraluvat.fi, suomâkielân) tâi ton lasseen meccihaldâttâs Aanaarjäävri kuálástemlove (maaŋgâ stáágu várás) (eraluvat.fi, suomâkielân). 
  • Pyeremustáá jävri suápá uštemân, puzzâvuoggáin kuáláástmân já runneest uággumân.
• Eres čääsih
  • Eres čaasijn vuoggâkuálástem várás kalga jo-uv mäksiđ  kyelivaljetipšommáávsu (tuše jävričääsih) (eraluvat.fi, suomâkielân) tâi ton lasseen Meccihaldâttâs kuálástemlove (eraluvat.fi, suomâkielân) (maaŋgâ stáágu várás, lope siskeeld meid luosâ- já šapšânalliis čácáduvâi kuoškâ- já virdesoojijd)

Huámmáš, et ain ko kuáláást nube náál ko uággumáin septijn tâi runneest, te 18–69-ihásiih kalgeh mäksiđ kyelivaljetipšommáávsu (eraluvat.fi, suomâkielân).

Miäcástiđ

Njellim kuávlun pirrâmpeivij mield räijejum mereh smaavâmeccivaljeloveh (eraluvat.fi, suomâkielân). Puásuituálu lii kuávlust merhâšittee áigápuátu, mon ferttee väldiđ huámášumán, jis lii miäccástmin pennuin.

Muorjiđ já kuobârdiđ

Ubâ Njellim kuávlust uážžu rijjâ čuággiđ muorjijd já kuobbârijd. Kuávlust šaddeh luámáneh, juuŋah, sareh já vuorâččâsmyerjih. Taatih láá táváliih, já tuše harvii suovsah láá puurrâm taid räigin.